Bruna­trygging hús­eigna

Í lögum um brunatryggingar segir “Húseigendum er skylt að brunatryggja allar húseignir. Húseignir samkvæmt lögum þessum eru hvers konar byggingar sem ætlaðar eru til íbúðar, atvinnustarfsemi, geymslu eða annarra afnota.”

Með því að brunatryggja húseign ertu ekki eingöngu að tryggja hana fyrir tjónum af völdum eldsvoða, því allar húseignir sem eru brunatryggð eru þar með líka tryggð hjá Náttúruhamfaratryggingu Íslands (NTÍ) fyrir tjóni af völdum jarðskjálfta og eldgosa. Sjá nánar.

Með lögum um brunatryggingar og lögum um Náttúruhamfaratryggingu Íslands er því verið að gæta fjárhagslegra hagsmuna húseigenda, enda geta brunar eða náttúruhamfarir valdið gríðarlegu tjóni á húseignum, jafnvel altjóni.

Þú getur óskað eftir endurmati á brunabótamati húseignar hjá HMS, til dæmis ef byggt hefur verið við húsið eða ráðist í endurbætur. Það fer síðan eftir niðurstöðu endurmatsins hvort brunabótamatið breytist.

Ef þér þykir brunabótamat ekki sýna rétt verðmæti húseignarinnar er hægt að sækja um viðbótarbrunatryggingu.

Það er skilyrði bótaréttar að tryggingafjárhæð lögboðnu brunatryggingar húseignarinnar nægi ekki til að bæta sannanlegt brunatjón.

Samkvæmt lögum um brunatryggingar er eigendum húsa í smíðum skylt að brunatryggja eign sína á smíðatímanum, rétt eins og fullbúin hús.

HMS gefur út brunabótamat á byggingar þegar þær hafa náð byggingarstigi 4 og þá fyrst fá tryggingafélög upplýsingar um framkvæmdina.

Þess vegna þurfa húseigendur að óska sérstaklega eftir brunatryggingu hjá sínu tryggingafélagi þegar að byggingarframkvæmdir hefjast. Nauðsynlegt er að láta uppfæra reglulega verðmæti brunatryggingarinnar á byggingartímanum, eftir því sem verðmætið eykst.

Þú sækir um brunatryggingu hjá okkur með því að senda okkur póst á sjova@sjova.is og við höfum samband við þig.

Um leið og brunatrygging er komin í gildi fyrir fasteign, hvort sem hún er í smíðum eða fullbúin, greiðist sjálfkrafa iðgjald til Náttúruhamfaratryggingar Íslands og er fasteignin þar með tryggð fyrir náttúruhamförum líka.

Brunatrygging húseigna tryggir eingöngu það byggingarefni sem skeytt hefur verið við fasteignina og sérhæfður búnaður fellur ekki undir hana heldur. Nauðsynlegt er að tryggja slíkt með eignatryggingu lausafjár.

Verðið fer eftir brunabótamati eða verðmati á húsnæði í smíðum, notkun og staðsetningu húsnæðis.

Viðskiptavinir í Stofni fá afslátt af iðgjaldi og tjónlausir og skilvísir viðskiptavinir fá einnig Stofnendurgreiðslu af iðgjaldi.

Með iðgjaldi brunatrygginga eru innheimt ýmis opinber gjöld sem lögð eru á alla húseigendur og miðast við vátryggingarfjárhæð brunabótamats. Þetta eru:

• Náttúruhamfaratryggingagjald sem rennur til Náttúruhamfaratryggingar Íslands, sem bætir tjón vegan náttúruhamfara.
• Forvarnagjald eða ofanflóðasjóðsgjald sem rennur til Ofanflóðasjóðs, sem er forvarna- og mannvirkjagerðarsjóður.
• Forvarnagjald sem rennur í ríkissjóð og fer í vernd mikilvægra innviða á Reykjanesskaga.
• Byggingaröryggisgjald sem rennur til Húsnæðis- og mannvirkjastofnunar.
• Brunabótamatsgjald sem rennur til Húsnæðis- og mannvirkjastofnunar til að halda utan um brunabótamat.

Nei, það er alls ekki nóg að tryggja eignina eingöngu með brunatryggingu, þó að það sé það eina tryggingin sem þér ber lögum samkvæmt að tryggja eignina með.

Mikilvægt er að tryggja fasteignina fyrir öðrum algengum tjónum með fasteignatryggingu. Eigendur einbýlis og sérbýlis kaupa þá tryggingu sjálfir en í fjölbýlum sér húsfélagið oft um að kaupa slíka tryggingu fyrir alla húseignina, þó undantekningar séu á því.

Einnig skiptir miklu máli að tryggja innbúið, sem oftar en ekki er verðmætara en við gerum okkur grein fyrir. Innbúið er tryggt með Fjölskylduvernd.