Líf­trygging

Það er óþægilegt að hugsa til þess hvað myndi gerast ef maður félli skyndilega frá. Það skiptir samt máli að leiða hugann að því, sérstaklega ef aðrir treysta á þig eða þú ert með fjárhagslegar skuldbindingar.

Með því að líftryggja þig geturðu verið viss um að fjárhagslegt öryggi þinna nánustu sé tryggt ef eitthvað kemur fyrir þig. Þá þarftu líka ekki að leiða hugann meira að þessu, ekki nema ef aðstæður þínar breytast í framtíðinni og ástæða sé þá til að yfirfara tryggingarnar þínar.

Því fyrr, því betra. Það er bæði einfaldara og ódýrara að kaupa líftryggingu þegar maður er ungur.

Við mælum því með að allir þeir sem eru orðnir 18 ára kaupi sjúkdómatryggingu en þú ættir að líftryggja þig þegar þú kaupir íbúð, með tilheyrandi skuldsetningu eða eignast börn.

Það er misjafnt hvað tryggingin kostar. Fjárhæð bótanna hefur mikil áhrif á verðið, því hærri sem þú velur að hafa þær því meira borgar þú fyrir trygginguna. Fjárhæð bótanna hækkar árlega miðað við breytingar á vísitölu neysluverðs, sem hefur líka áhrif á iðgjaldið sem þú greiðir fyrir trygginguna.

Ýmislegt sem tengist heilsufari og lífsstíl getur haft áhrif á verðið, eins og hvort þú reykir eða ekki. Aldur hefur líka áhrif, þeir sem eru yngri greiða lægra iðgjald en þeir eldri.

Ungt fólk getur til dæmis keypt sér góða líf- og sjúkdómatryggingu fyrir jafn mikið og það borgar fyrir mánaðaráskrift að streymisveitu.

Þú velur hvað bæturnar eiga að vera háar þegar þú sækir um trygginguna. Þá tekurðu mið af tekjum, skuldastöðu og fjölskylduhögum og velur þá upphæð sem hentar þínum aðstæðum.

Það er mikilvægt að yfirfara upphæðirnar reglulega, sérstaklega þegar aðstæður þínar breytast, eins og þegar barn fæðist eða breytingar verða á hjúskapar- eða skuldastöðu.

Tryggingin greiðir líka bætur ef barn þess sem er líftryggður fellur frá fyrir 18 ára aldur. Bætur vegna barna eru 10% af bótafjárhæð líftryggingarinnar en þó aldrei hærri en 2 milljónir vegna hvers barns.

Ef þú fellur frá af völdum slyss eða sjúkdóms þá eru bætur greiddar til rétthafa. Þú ákveður hverjir rétthafar á bótum úr líftryggingunni þinni eru og gengur frá því þegar þú sækir um hana.

Hægt er að velja um nokkra möguleika í umsókninni:

• Ekki tilnefndur rétthafi
  
  Þetta þýðir að ef þú átt maka fær hann allar bæturnar greiddar. Athugaðu að maki er sá sem þú ert í hjúskap með, ekki í óvígðri sambúð.
  
  Ef þú átt ekki maka þá þýðir þetta að barnið þitt eða börnin þín eru rétthafar bótanna.
  
  Ef þú átt hvorki maka né börn þá eru bæturnar greiddar til erfingja samkvæmt lögum.
  
• Lögerfingjar
  
  Ef þú velur þennan möguleika fær maki þinn 1/3 bótanna en börn 2/3. Athugaðu að maki er ekki sá sem þú ert í óvígðri sambúð með.
  
• Skráning rétthafa á nafn
  
  Hér getur þú valið rétthafa, einn eða fleiri. Þessi möguleiki getur til dæmis hentað þeim sem eru í óvígðri sambúð.

Þú getur alltaf breytt tilnefningu rétthafa eftir að líftryggingin tekur gildi. Það getur til dæmis verið nauðsynlegt ef breytingar verða á fjölskylduhögum þínum.

Til að breyta rétthafaskráningu hefur þú samband við okkur með að senda póst á sjova@sjova.is eða hringja í 440 2000.

Bætur vegna andláts barna eru greiddar til þín, sem ert með trygginguna í gildi.

Bætur eru greiddar úr líftryggingu hvort sem dánarorsök er slys eða sjúkdómur. Bæturnar eru greiddar út í einu lagi og eru skattfrjálsar.

Tilkynna þarf andlát hér. Tilkynnandi skráir sig inn með rafrænum skilríkjum og velur Fólk/Andlát að loknum upphafsskrefum. Ef þörf er á upplýsingum eða aðstoð við að tilkynna andlát má endilega hafa samband við okkur í netspjalli, síma 440 2000, með því að senda tölvupóst á sjova@sjova.is eða koma við í næsta útibúi okkar.

Þegar tilkynning um andlát hefur borist okkur þurfum við að afla gagna til að geta afgreitt bæturnar. Reikna má með að sú gagnaöflun geti tekið um 4-6 vikur.

Ef þú missir meira en helming starfsorku þinnar getur þú sótt um að fá iðgjaldið lækkað eða fellt niður í allt að 5 ár, án þess að tryggingin skerðist.

Þetta kallast iðgjaldafrelsi og er innifalið í líftryggingunni okkar. Til að sækja um iðgjaldafrelsi þarftu að tilkynna það hér undir Fólk - veikindi eða slys.