Mikilvægt er að vinnuveitendur bregðist rétt við ef slys verður á vinnustað. Áríðandi er að koma slösuðum í öruggar hendur m.t.t. eðli áverka hverju sinni og ávallt skal hringja í neyðarlínu, 112 ef um alvarlegt slys er að ræða.
Það er á ábyrgð vinnuveitanda að tilkynna vinnuslys og sjá til þess að rannsókn fari fram í öllum tilvikum eins fljótt og auðið er og áður en vettvangi er raskað.
Vinnuveitanda ber að tilkynna vinnuslys til Vinnueftirlits, Sjúkratrygginga Íslands og eftir atvikum til lögreglu og Sjóvá:
Sjái Vinnueftirlit eða lögregla ekki ástæðu til að koma á staðinn er eftir sem áður áríðandi að vinnuveitandi tryggi sönnun á aðstæðum og tildrögum slyss með innanhússrannsókn, sjá hér:
Ráðlegt er að vista öll gögn tengd slysinu í sömu möppu í tölvunni svo auðvelt sé að nálgast gögnin ef á þarf að halda. Vönduð viðbrögð við vinnuslysum tryggja það að málið fær bæði réttari og skjótari úrvinnslu hjá tryggingafélaginu. Auk þess sem það minnkar líkur á vafa við mat á bótarétti, en dómafordæmin sýna að allur vafi er metinn vinnuveitanda í óhag.
Varðandi rafræna vöktun og varðveislu og afhendingu á myndefni bendum við á að í reglum um rafræna vöktun nr. 50/2023 er að finna heimild fyrir því að senda tryggingafélagi myndefni til að unnt sé að ákvarða bótaskyldu í tjónamáli (sbr. 10. gr.). Eins má þar finna heimild fyrir því að varðveita myndefni lengur en í 30 daga ef tjónsatvik verður (sbr. 11. gr.). Eyða skal síðan myndefni þegar ekki er lengur málefnaleg ástæða til að varðveita það. Bendum ykkur á að kynna ykkur efni reglna nánar í skjalinu hér fyrir neðan.
Að lokum bendum við á mikilvægi þess að fyrirtæki sinni forvörnum og geri áhættumat fyrir helstu þætti starfseminnar til að auka öryggi starfsfólks í sínu vinnuumhverfi og koma í veg fyrir slys.
Ráðgjafar okkar á fyrirtækjasviði eru alltaf tilbúnir að svara spurningum eða veita ráðgjöf. Við bjóðum fyrirtækjum uppá áhættuheimsóknir. Hægt er að senda fyrirspurn á fyrirtaeki@sjova.is