Vinnustaðurinn
Sjóvá leitast við að vera eftirsóknarverður vinnustaður sem laðar að sér metnaðarfullt og hæft starfsfólk og skapar starfsmönnum tækifæri til að eflast og þróast í starfi.
Höfuðstöðvar okkar eru í Kringlunni 5 í Reykjavík en samtals höfum við að skipa fjórtán útibúum sem og umboðs- og þjónustuskrifstofum víðs vegar um landið.
Um 200 manns starfa hjá félaginu og leggjum við kapp á að þjónusta okkar sé öllum aðgengileg, hvort sem um er að ræða fyrirtæki eða einstaklinga.
Sjóvá í hnotskurn
- Hjá okkur er afar sterk vinnustaðamenning sem einkennist af stolti, trausti, samheldni, metnaði og mikilli starfsánægju. Við trúum því að sterk menning og mikil starfsánægja séu lykillinn að því að veita framúrskarandi þjónustu til viðskiptavina okkar.
- Starfsánægja hefur mælst undanfarin ár með því hæsta sem mælist meðal íslenskra fyrirtækja. Í árlegri könnun Gallup fyrir árið 2024 mældist hún 4,6 af 5.
- Sjóvá hefur einnig verið í efstu 5 sætum stærri fyrirtækja skv. könnun VR um Fyrirtæki ársins síðastliðin 6 ár. Könnunin er stærsta vinnumarkaðskönnun á Íslandi og mælir hún níu áhrifaþætti starfsánægju á vinnustöðum.
- Stefna okkar er að bjóða samkeppnishæf laun og framúrskarandi aðbúnað sem laðar að sér hæft starfsfólk.
- Allar vinnustöðvar okkar eru opnar, bjartar og búnar fyrsta flokks búnaði, ásamt því að bjóða upp á niðurgreiddan hádegismat, aðgengi að hollu millimáli og fyrirtaks kaffiaðstöðu.
- Við bjóðum upp á fjölskylduvænan vinnustað og sveigjanlegt starfsumhverfi. Fjarvinna er í boði og helstu markmið hennar eru að veita starfsfólki möguleika á betra vinnunæði og skapa betra jafnvægi milli vinnu og einkalífs.
- Við bjóðum starfsfólki upp á tækifæri til að lengja fæðingarorlof á launum og koma í hlutastarf að því loknu.
- Sjóvá á einnig þrjú orlofshús á Suðurlandi ásamt orlofsíbúð á Akureyri, sem starfsfólk getur leigt.
- Þekking er eitt af gildum okkar. Starfsfólk okkar býr yfir fjölbreyttri þekkingu, menntun og reynslu. Lögð er mikil áhersla á öfluga fræðslu og þjálfun nýrra starfsmanna sem og stöðuga símenntun starfsfólks.
- Fræðslustefna og dagskrá okkar leggur áherslu á fjölbreytt úrval námskeiða, erinda og þjálfun, bæði stað-, fjar- og rafræna fræðslu. Gott samstarf er við fjölda fræðslustofnana og skóla um aðgang að námi og námskeiðum.
- Samtök fjármálafyrirtækja og tryggingafyrirtækin reka saman braut innan Háskólans í Reykjavík sem býður upp á sérhæft nám í lögum um vátryggingastarfsemi fyrir starfsfólk sitt, og það nám er í boði fyrir allt starfsfólk Sjóvá.
- Starfsfólk okkar er auk þess hvatt til að vera vel vakandi fyrir tækifærum til að styrkja sig í starfi og fær stuðning við símenntun og starfsþróun.
- Jafnrétti er okkur hjartans mál og viljum við stuðla að því á öllum stigum starfseminnar. Mannréttindastefna okkar og metnaðarfull jafnréttisáætlun vísa okkur veginn í þessum málaflokki.
- Sjóvá hefur verið með jafnlaunavottun frá árinu 2014. Leitast er við að tryggja jöfn kynjahlutföll innan deilda, sviða og verkefnahópa. Horft er til þessara þátta við ráðningar og starfsþróun á öllum stigum. Jafnlaunagreiningar eru gerðar reglulega og hefur launamunur karla og kvenna aldrei mælst hærri en 2% frá því að mælingar hófust.
- Fjölbreytileiki starfsmannahópsins endurspeglast meðal annars í fjölbreyttum bakgrunni, reynslu, aldri, menntun og búsetu. Hjá okkur starfar fólk með langa reynslu og mikla sérþekkingu á tryggingastarfsemi, en einnig fólk sem hefur aflað sér reynslu og þekkingar á ýmsum öðrum sviðum. Um það bil fjórðungur starfsfólks hefur starfað hjá Sjóvá í yfir 15 ár, yfir þriðjungur hefur starfað í 5-15 ár og yfir þriðjungur skemur en í fimm ár. Mikil aldursbreidd er einnig, en hjá okkur starfa starfsmenn frá 20 ára til 67 ára aldurs í nánu samstarfi alla daga.
- Við erum með vinnustöðvar á 14 stöðum víðsvegar um landið þar sem viðskiptavinir okkar geta fengið ráðgjöf og þjónustu í sinni heimabyggð.
- Sjóvá hlaut Hvatningarverðlaun jafnréttismála 2020 Samtaka atvinnulífsins, en verðlaunin eru veitt fyrirtæki sem hefur stuðlað að jafnrétti á markvissan hátt í starfsemi sinni. Sjóvá hefur einnig verið stoltur styrktaraðili Jafnvægisvogarinnar og fengið viðurkenningu Jafnvægisvogarinnar fyrir jöfn kynjahlutföll stjórnenda frá upphafi.
- Heilbrigð og ánægð sál í heilbrigðum líkama er markmið heilsustefnu okkar, og vel er stutt við heilsusamlegt líferni starfsfólks með margskonar fræðslu, styrkjum og viðburðum.
- Boðið er upp á líkamsræktarstyrk, árlegar heilsufarsmælingar og inflúensubólusetningu. Kostnaður vegna sálfræðiþjónustu, sjúkraþjálfunar og krabbameinsskoðana er niðurgreiddur. Í höfuðstöðvum okkar er búningsaðstaða og líkamsræktarsalur sem eru opin fyrir starfsfólk alla daga frá 7 til 23.
- Golfklúbbur starfsmannafélagsins okkar stendur fyrir námskeiðum og mótum yfir sumartímann og er með vinavelli um allt land.
- Starfsmannafélag okkar heldur úti öflugu og fjölbreyttu starfi fyrir starfsfólk og fjölskyldur þeirra og stendur fyrir viðburðum, námskeiðum og ferðum allt árið um kring.
- Mikil áhersla er lögð á öryggismál í daglegum rekstri Sjóvár og leitast er við að tryggja öryggi starfsmanna og starfsstöðva, upplýsinga og gagna í eigu félagsins og viðskiptavina þess.
- Öryggiskerfi eru á öllum starfsstöðum Sjóvár og mótaðir hafa verið verkferlar til að tryggja að brugðist sé rétt við boðum frá öryggiskerfum og hótunum eða áreiti í garð starfsmanna. Starfrækt er viðbragðsteymi sem ber ábyrgð á að bregðast við ef upp koma atvik sem haft geta áhrif á velferð eða líðan starfsfólks.
- Sálfélagslegt áhættumat er framkvæmt reglulega þar sem líðan starfsfólks er metin, ásamt því að greindir eru þeir áhættuþættir sem varða félagslegan aðbúnað á vinnustað.
Vinnuumhverfi og velferð
Sjóvá hefur fengið hæstu einkunn fyrir félagsþætti sem ná m.a. til vinnuumhverfis og velferðar starfsfólks í UFS áhættumati Reitunar undanfarin ár.