Sjálf­bærni í tjóna­þjónustu

Ein helstu tækifæri okkar til áhrifa í sjálfbærnimálum liggja í forvörnum. Með því að koma í veg fyrir tjón fyrirbyggjum við m.a. sóun sem gæti orðið í tengslum við þau.

Verði tjón gerum við það sem í okkar valdi stendur til að minnka umfang þess. Við erum með tjónavakt allan sólarhringinn og með þeim hætti geta viðskiptavinir alltaf haft samband við okkur og við leiðbeint þeim hratt og vel til að takmarka tjónið, bæði með ráðgjöf á tjónsstað, í gegnum síma og í gegnum fjarskoðunarlausnina Innsýn.

Með því að tilkynna tjón á Sjóvá.is þarf viðskiptavinurinn ekki að gera sér ferð með tjónstilkynningu í útibú okkar og því sparast mikill akstur.

Við höfum lagt mikla áherslu á að gera tilkynningarferlið einfalt og þægilegt í notkun og hefur hlutfall þeirra sem tilkynna tjón á Sjóvá.is stóraukist á undanförnum árum.

Við notum fjarskoðunarlausnina Innsýn til að meta t.d. ýmis eignatjón. Þá getur tjónamatsmaður okkar skoðað tjón og aðstæður á vettvangi í gegnum snjalltæki viðskiptavinar. Þannig sparast bæði akstur tjónamatsmanna okkar og akstur viðskiptavina.

Notkun Innsýnar hefur því minnkað kolefnisspor okkar töluvert á undanförnum árum og sparaði hún til dæmis 42 þúsund km akstur tjónamatsmanna á árinu 2023.

Sum tjón er ekki hægt að meta með fjarskoðun og því nauðsynlegt fyrir tjónamatsmenn okkar að fara á staðinn. Til að minnka neikvæð umhverfisáhrif þessa aka tjónamatsmenn okkar á rafbílum, en allir bílar á vegum Sjóvá hafa verið rafbílar frá 2023.

Við leggjum áherslu á að gera við þá hluti sem hægt er að gera við í stað þess að skipta þeim út. Í því samhengi er lykilatriði að eiga gott samtal við viðskiptavini svo þeir séu upplýstir um marga kosti viðgerða.

Við höfum lagt mikla áherslu á það að láta gera við þær framrúður sem verða t.d. fyrir steinkasti og unnið að átaki í þeim efnum með samstarfsaðilum okkar um land allt.

Með því að setja framrúðuplástur á skemmdina er hægt að auka líkurnar á því að hægt sé að gera við rúðuna. Það losar 24 þúsund sinnum meiri koltvísýring að láta skipta um rúðu en að gera við hana og því er til mikils að vinna.

Eins gerum við kröfu um að samstarfsaðilar okkar á verkstæðum kanni hvort til séu notaðir varahlutir við viðgerðir á ökutækjum.

Við höfum sett okkur markmið um aukningu á hlutfalli framrúðuviðgerða og notkun á notuðum varahlutum og er greint frá árangrinum í árs- og sjálfbærniskýrslu.

Viðskiptavinir okkar eiga rétt á bótum á meðan ökutæki er í viðgerð eftir tjón. Geta þeir valið á milli þess að fá peningagreiðslu fyrir þá daga sem bíllinn er á verkstæði eða að fá bílaleigubíl til afnota.

Við höfum undanfarin ár lagt áherslu á að kynna betur möguleikann á peningagreiðslu, þar sem fólk getur oft séð af bílnum í þann tíma sem verið er að gera við hann og bílaleigubíllinn því óþarfur.

Við höfum sett okkur markmið um að auka hlutfall þeirra sem velja peningagreiðsluna og greinum frá árangrinum í ársskýrslu.

Við leitum leiða til að nýta tjónaða muni áfram, til dæmis muni sem hafa aðeins orðið fyrir útlitsskemmdum en hafa fullt notagildi. Það gerum við til dæmis með að bjóða viðskiptavinum okkar að nota þá áfram eða með því að koma þeim til annarra sem geta nýtt þá.

Þá eru aðrir hlutir sem ekki er hægt að nota líkt og áður en hægt er að nýta með öðrum hætti, s.s. með að búa til eitthvað annað úr hluta þeirra.

Við höfum sem dæmi verið í góðu samstarfi við Fjölsmiðjurnar í Reykjavík og á Suðurnesjum á undanförnum árum og hafa tjónamunir gengið þar í endurnýjun lífdaga og nýst til kennslu og þjálfunar. Eins höfum við útvegað fjölskyldum húsgögn í samvinnu við húsnæðisfulltrúa flóttafólks á síðustu árum og ýmis góðgerðarfélög hafa fengið sendingar sem þau hafa geta nýtt.

Við gætum vel að því að þeim munum sem ekki eru nýtilegir sé fargað á sem skynsamlegastan hátt. Starfsmaður okkar því eftir að koma munum í góð not en jafnframt að þeir munir sem er fargað séu flokkaðir á réttan og ábyrgan máta.