Neighborhood Watch

Þegar setja á upp nágrannavörslu þarf að huga að ýmsu. Til einföldunar höfum við sett ferlið upp í sex skref:

• Byrjið á að kynna ykkur helstu upplýsingar hér á vefsíðunni um nágrannavörslu.
• Kannið áhuga meðal nágranna og hugið að því hversu stórt nágrannavörslusvæðið á að vera. Reynslan sýnir að árangursríkara er að skipuleggja nágrannavörslu á minni svæðum, svo sem í einni götu eða í einu fjölbýlishúsi.
• Athugið hvort einhverjar reglur gildi um nágrannavörslu í sveitarfélaginu. Í mörgum tilfellum þarf að fá formlegt leyfi fyrir að stofna til nágrannavörslu. Gott getur verið að hafa samband við lögregluna í hverfinu og óska eftir góðum ráðum frá þeim, upplýsingum eða þátttöku í kynningarfundi.
• Gott er að halda kynningarfund um nágrannavörslu fyrir fólkið í hverfinu. Mikilvægt er að undirbúa fundinn vel, það eykur líkur á að hugmyndin verði að veruleika.
• Gagnlegt er að nota gátlista sem finna má hér að neðan til að gera heimilið sem öruggast og varna innbrotum.
• Pantið nágrannavörsluskilti og límmiða og setjið upp í ykkar götu. Kannið hvort að sveitarfélagið útvegi skilti, annars er hægt að nálgast það hjá Sjóvá.

Flest innbrot eiga sér stað þegar enginn er heima eða þegar allir eru í fastasvefni. Einnig eru dæmi um að þjófar fari inn þegar einhver er heima yfir daginn og útidyr, svalir eða garðdyr standa opnar. Eins ef tekið er úr lás í anddyri hússins.

Þess vegna skiptir miklu máli að allir á heimilinu gæti þess að læsa hurðum og loka gluggum hvort sem farið er í vinnu, skóla eða burtu yfir lengri tíma. Ekki er ráðlegt að geyma lykla undir mottunni eða í blómapotti við anddyri þar sem það er frekar augljós staður til að leita á. Best er að geyma aukalykla hjá nágranna, vini eða ættingja. Einnig er skynsamlegt að skipta um skrá þegar flutt er í nýtt húsnæði.

Góð útilýsing hefur fælingarmátt og til er lýsing sem tengd er við hreyfiskynjara. Mælt er með að millidyr fjölbýlishúsa séu læstar og að gestir þurfi að hafa samband við þann sem þeir eiga erindi við.

Öryggiskerfi sporna gegn innbrotum en öryggiskerfi eitt og sér kemur þó aldrei í veg fyrir innbrot. Í þeim felst þó mikill fælingarmáttur og þau virkja utanaðkomandi aðstoð. Gott er að setja límmiða sem fylgja öryggiskerfinu á áberandi staði. Einnig er mikilvægt að kenna börnum á heimilinu á þjófavarnakerfið og brýna fyrir þeim að nota það.

Skynsamlegt er að láta heimilið líta eðlilega út utan frá þegar farið er burt yfir lengri tíma. Gott getur verið að fá góðan granna, fjölskyldu eða vin til að ganga um heimilið og lóðina á meðan þú ert í burtu. Einnig er skynsamlegt að gæta þess hvað sett er á samfélagsmiðla og tilkynna ekki um fjarveru frá heimili. Við mælum með að fara yfir gátlista fyrir fríið áður en lagt er í hann.

Gott er að biðja góðan granna um að:

• Hafa auga með grunsamlegum bíla- og mannaferðum
• Fylgjast með að póstur safnist ekki upp í bréfalúgu/póstkassa
• Setja sorp í ruslatunnu
• Leggja bifreið í heimreið
• Draga gluggatjöld frá/fyrir af og til
• Kveikja og slökkva ljós
• Slá blettinn að sumri til og/eða moka snjó að vetri til
• Tilkynna lögreglu um grunsamlegt athæfi

Miklu máli skiptir að bregðast rétt við. Gættu þín á að innbrotsþjófurinn gæti enn verið á vettvangi og þú verður fyrst og fremst að huga að öryggi þínu. Sýndu því skynsemi og ekki fara inn í húsið ef þú telur að einhver sé inni í því.

Hringdu strax á lögregluna í 112 og tilkynntu innbrotið. Ef þú kemur heim og sérð að brotist hefur verið inn hjá þér er mikilvægt að hreyfa ekki við neinu fyrr en lögreglan kemur. Ef ókunnugur bíll er fyrir utan þá getur verið gagnlegt að taka niður bílnúmerið, til dæmis með því að taka mynd af bílnum.

Eðlileg viðbrögð eru að vilja reka viðkomandi strax út. En mikilvægt er að sýna varkárni. Þú veist ekki í hvaða ástandi þjófurinn er eða hvað þeir eru margir. Hringdu í neyðarlínuna 112 og óskaðu eftir aðstoð til dæmis með því að segja að brotist hafi verið inn og að þjófarnir séu enn í húsinu.