Alþingi samþykkti nýverið breytingu á lögum um Náttúruhamfaratryggingu Íslands (NTÍ) sem felur í sér heimild stofnunarinnar til þess að hækka iðgjöld tímabundið um 50%.
Lögum samkvæmt sjá tryggingafélögin um að innheimta iðgjöld fyrir hönd NTÍ og eru þau hlutfall af vátryggingafjárhæð húseigna, innbús og annars lausafjár. Í dag, 27. nóvember 2024, tilkynnti NTÍ um breytingar á iðgjöldum til stofnunarinnar, sem munu hækka úr 0,025% í 0,0375% af vátryggingafjárhæð frá og með 1. janúar 2025.
Öllum tryggingafélögum er skylt samkvæmt lögum að gera ráðstafanir til að innheimta breytt iðgjald m.v. þessa hækkun.
Tilkynning NTÍ er svohljóðandi:
Alþingi samþykkti nýverið breytingu á lögum um Náttúruhamfaratryggingu Íslands (NTÍ) sem felur í sér heimild stofnunarinnar til þess að hækka iðgjöld tímabundið um 50%.
Atburðirnir, sem átt hafa sér stað á Reykjanesi undanfarið, hafa haft veruleg áhrif á fjárhagslega stöðu NTÍ. Stofnunin þarf á hverjum tíma að eiga fjármuni til að greiða bætur vegna tjóns á húseignum, innbúi og öðru lausafé sem vátryggt er hjá NTÍ.
Heimild til hækkunar á iðgjöldum NTÍ verður nýtt og frá og með 1. janúar 2025 og verða þau innheimt með 50% álagi samhliða brunatryggingariðgjöldum. Iðgjald fyrir húseignir, innbú og annað lausafé fer úr 0,025% í 0,0375% af vátryggingarfjárhæð.
Sem dæmi um áhrif þessara breytinga mun iðgjald til NTÍ af 80 milljón króna eign hækka úr kr. 20.000 á ári í kr. 30.000 á ári og iðgjald af innbústryggingu á 20 milljón króna innbúi mun hækka úr kr. 5.000 í kr. 7.500 á ári.
Nánar um Náttúruhamfaratryggingu Íslands og iðgjöld
Náttúruhamfaratrygging Íslands er opinber stofnun sem hefur það hlutverk að vátryggja húseignir og brunatryggt lausafé, þ.m.t. innbú, gegn tjóni af af völdum jarðskjálfta, eldgosa, skriðufalla, snjóflóða og vatnsflóða.
Meðal þeirra gjalda sem innheimt eru samhliða brunatryggingaiðgjöldum hjá almennu vátryggarfélögunum (Sjóvá, TM, Verði og VÍS) er lögbundið iðgjald sem rennur til Náttúrhamfaratryggingar Íslands (NTÍ). Iðgjaldið hefur í áratugi verið innheimt óháð áhættu, af eignum um allt land sem fast hlutfall af brunabótamati húseigna og vátryggingarfjárhæðum lausafjár.
